Во пресрет на најавениот бојкот од страна на граѓаните, маркетите решија да реагираат со промотивни акции, при што најавуваат значително намалување на цените, особено на основните и најпотребните производи.
Еден од првите што се приклучи на оваа иницијатива е ланецот маркети „Тинекс“, кој објави посебни попусти на одредени производи со цел да им излезе во пресрет на потрошувачите.
„Тинекс ги разбира потребите на македонските купувачи и ја започнува кампањата ‘Твој избор, твоја заштеда’, во рамки на која веќе од 31 jануари и во текот на февруари ќе понуди намалување на голем број производи, кои се неопходни за потребите на едно семејство.
Станува збор за производи, кои се клучни за функционирањето на домаќинствата и веруваме дека ќе придонесат во заштеди на семејниот буџет. Маркетите се само дел од ланецот на дистрибуција на прехранбените и останатите производи, со што можноста за влијание врз цените е навистина минимална“, објавија од компанијата.
