Во Македонија традиционално семејствата се собираат на вечера на Бадник, кога се подготвува богата трпеза составена исклучиво од посна храна. На масата може да се најдат сарма, грав, компир, риба, зелник, овошје и други јадења, кои имаат симболична улога да осигураат плодност и богат род на земјоделските култури во идната година.
Еден од најзначајните обичаи е подготовката на леб, пита или погача, во која се става паричка. Секој од присутните на вечерата ја бара својата паричка, а оној кој ќе ја најде се смета за најсреќен во следната година.
Во некои делови на Македонија, пак, овој обичај со кршење на лепчето и наоѓање на паричката се изведува на Василица. Иако некои црковни лица истакнуваат дека на Бадник треба да се биде дома и да се седи на маса, тие сметаат дека обичајот за кршење лепче со паричка не е црковен, туку фолклорен и може да се практикува на Василица.
На крај, изборот за тоа кога и како ќе се практикува овој обичај останува на самите луѓе – дали ќе го направат на Бадник или на Василица.
