Новата 2025 година носи оптимистични најави за здравствениот сектор, изјави министерот за здравство Арбен Таравари. Според него, годинава ќе се фокусира на зголемување на платите, отворање на нови работни места и спроведување на значајни инвестиции во здравството.
„Здравствените работници бараат подобри услови за работа, а тоа е клучно за да можеме да обезбедиме повисок квалитет на здравствените услуги за пациентите,“ истакна министерот. Оваа изјава ја даде по посетата на првороденчето на Клиниката за гинекологија и акушерство (ГАК) во првите часови од Новата 2025 година, одговарајќи на прашањето дали и за здравствените работници ќе биде бериќетна годината.
Таравари посочи дека започнатите реформи во здравството се дел од долгорочен процес и не може да се очекуваат резултати „преку ноќ“. Сепак, тој нагласи дека Министерството останува посветено на создавање на подобра иднина за здравствениот систем во земјата.
