Горан Станковски од Крива Паланка низ солзи признава дека минува низ најтешкиот период во својот живот.
Како татко на три малолетни деца, со многу труд и работа успеал да обезбеди две мали соби за своето семејство. Но, животот му нанел тежок удар. Пред неколку години, додека работел, доживеал сериозна несреќа – врз него паднал контејнер, што му нанело тешки повреди. Последиците од тие повреди ги чувствува и денес. Повредите на нозете му предизвикале трајни оштетувања, поради што веќе бил подложен на една операција, а наскоро го очекува уште една во Скопје.
Поради неговата здравствена состојба, Горан не може да работи. Неговата сопруга, исто така, не е вработена, па семејството преживува со само 9.000 денари месечно. Нивниот најмал син, десетгодишниот Јован, со тага зборува за нивната ситуација.
„Сме многу сиромашни. Немаме услови за учење – сите сме во една соба. Често сум гладен, и дома и на училиште. Ги гледам децата во училиште како јадат кифла или сендвич, а јас се виткам од глад. Често останувам без храна, затоа што моите родители немаат пари да ми дадат“, вели Јован.
Семејството Станковски апелира до хуманите луѓе да им помогнат во оваа тешка ситуација. Доколку сакате да им подадете рака, можете да го направите тоа преку следниве начини:
- Контактирајте го Горан на неговиот телефонски број: 079/240-762
- Донирајте средства на неговата жиро-сметка: 240357012601383
- Поддржете ја активната кампања на платформата e-crowd.mk, каде се собираат донации за семејството.
Ваша мала помош може да донесе голема промена во животот на ова семејство.
