Фудбалската федерација на Македонија (ФФМ) денеска доби нов претседател. На вонредното Собрание на ФФМ, откако беше официјализирана оставката на Муамед Сејдини, делегатите едногласно го избраа Масар Омерагиќ за нов лидер на македонскиот фудбал.
После шест години водство на Муамед Сејдини, ФФМ влегува во нова етапа под раководството на Масар Омерагиќ, кој со својот искуствен багаж и познавање на фудбалот ќе се стреми да ја направи македонската фудбалска сцена посилна и поконкурентна.
„Јас сум од вас, човек од фудбалот, и знам која насока треба да ја преземеме за развој на фудбалот во Македонија. Ова е тимска работа, како и самиот фудбал. Потребно е многу труд и посветеност за да се постигнат резултати. Работата започнува веднаш. Имам јасни приоритети: враќање на фудбалските легенди во структурата на ФФМ, создавање услови за секое дете да се развива како фудбалер, воведување на ВАР во најкраток можен рок и подобрување на инфраструктурата за сите фудбалери. Мојот план е насочен кон редовно одржување на првенствата и целосно обединување на сите национални селекции, особено на А селекцијата“, изјави Масар Омерагиќ по изборот за претседател.
