Поглаварот на Македонската православна црква, г.г. Стефан, истакна дека Свети Климент Охридски е жив доказ за природноста на светоста, бидејќи како просветител и учител подготвувал илјадници ученици за служба на црквата. Тој не само што ги вовел во тајните на буквите, туку и им ја открил длабоката смисла на напишаното, оставајќи непроценливо културно и духовно наследство.
Светата Македонска црква, која претставува неговото најголемо завештание, е сведоштво за неговото дело и визија. Тоа е наследство кое вечно ќе го чуваме, бидејќи преку него го зачувуваме не само нашето минато, туку и нашиот духовен и национален идентитет. Чувајќи ги вистините на верата, светото предание и нашите древни традиции, ние не само што го славиме делото на Свети Климент, туку и го продолжуваме неговиот пат.
„Во овие денови, кога како црква и држава го чествуваме неговиот светол спомен, наша обврска е секојдневно да се трудиме да го следиме неговиот пример. Преку Свети Климент се приближуваме кон Христа, а неговиот молитвен покров нека биде над сите нас. Неговото дело нека продолжи да блеска како светлина што ќе ги осветлува и води нашите срца низ предизвиците на идните времиња,“ порача поглаварот г.г. Стефан.
