Андрија И. (17) почина денеска во Општата болница во Лесковац, откако, според сомнежите, бил претепан од Немања А. (18). Осомничениот брзо бил уапсен, а со него во друштво бил и В. Т. (15), кој е сведок на настанот.
Според изјавата на министерот за внатрешни работи, Ивица Дачиќ, Немања А. е уапсен под сомнение дека на тинејџерот му нанел тешки телесни повреди опасни по живот, од кои младиот човек подоцна им подлегнал.
„Службениците на Министерството за внатрешни работи во Лесковац го уапсија Н.А. (18) од Лесковац, под сомнение за извршување на кривичното дело убиство. Се сомневаме дека тој денеска му нанел повеќе удари со раце и нозе во пределот на главата и телото на А.И. (17), нанесувајќи му тешки телесни повреди опасни по живот, од кои жртвата подоцна починала во Општата болница во Лесковац,“ изјави министерот Дачиќ.
Старателот на починатиот, видно потресен, денеска изјави дека Андрија се враќал од училиште кога бил нападнат.
„Никого не вознемирувал. Тој и неговиот брат се кај нас веќе 13 години. Тоа се златни деца. Ги засакавме како свои. Братот на Андрија го заврши средното улилиште, а самиот Андрија беше мирен како бубачка. Ова е огромен шок за нас“, изјави тој.
