Околу 300 градежни машини и околу 600 работници се мобилизирани за секојдневна работа на трасата на автопатот Кичево – Охрид, каде што започна зимско асфалтирање – практика што за прв пат се применува по пет децении.
Министерот за транспорт и врски, Александар Николоски, изјави дека, за да се надминат предизвиците со техничките услови за асфалтирање во зимски период, било неопходно да се извршат измени во Законот за изградба на автопатот.
– Примената на зимско асфалтирање, дури и при температури под нулата, има за цел да го забрза темпото на изградба и да ни овозможи да ги исполниме зададените рокови. Планираме до почетокот на летната сезона да пуштиме во употреба околу 40 километри од трасата, од Врбјани до Охрид, со еден мал прекин кај Ботун. Целосната изградба на автопатот ја очекуваме до крајот на 2026 година – истакна Николоски.
Оваа нова методологија е дел од напорите за зголемување на ефикасноста и за побрзо реализирање на клучните инфраструктурни проекти, кои се од значење за регионалната поврзаност и економскиот развој.
