Кинеското Министерство за надворешни работи денеска објави дека ќе ја прошири својата политика на безвизен режим за девет дополнителни држави, вклучувајќи ја и Македонија.
Според официјалното соопштение, кое го пренесе портпаролот на Министерството, Лин Џијан, на прес-конференција во Пекинг, безвизниот режим ќе важи во периодот од 30 ноември 2024 година до 31 декември 2025 година. Оваа политика се однесува на обични носители на пасоши од Македонија, како и од Бугарија, Романија, Хрватска, Црна Гора, Малта, Естонија, Летонија и Јапонија.
Дополнително, Кина планира да го продолжи дозволениот период на безвизен престој од досегашните 15 дена на 30 дена, што претставува значително олеснување за патниците. Овие нови мерки, кои ги пренесе државната телевизија CCTV, имаат за цел да го поттикнат меѓународниот туризам и економската соработка со наведените земји.
