Државниот санитарен и здравствен инспекторат (ДСЗИ) денеска спроведе инспекциски надзор на Универзитетската клиника за детски болести во Скопје, при што беа откриени значителни неправилности. Поради утврдените недостатоци, најавено е издавање прекршочен платен налог за одговорните лица.
Како што информираат од ДСЗИ, инспекцискиот надзор е извршен со цел да се провери усогласеноста со претходно наложените мерки. Сепак, констатирано е дека Клиниката не постапила целосно според издаденото решение.
„Од 14 доктори специјализанти кои ги исполнуваат условите за добивање времена лиценца за работа од Лекарската комора на Македонија, само двајца поседуваат таква лиценца. Дополнително, не е поднесено барање до Министерството за здравство за обезбедување времени факсимили за работа, што е неопходно за останатите специјализанти. Во ноќните смени, амбулантата на Клиниката ја опслужуваат специјализанти без времени факсимили или доктори кои не ги исполнуваат критериумите за постари специјализанти“, стои во соопштението на Инспекторатот.
