Заменик-претседателот на Владата и министер за транспорт, Александар Николоски, во гостување на ТВ Телма изјави дека активно се бараат грантови за реализација на проект за воведување на отворен систем на патарини, со цел подобрување на ефикасноста и олеснување на патувањето.
„Нашата цел е да воведеме отворен систем на патарини, кој би бил поразличен од сегашниот. Во моментот, нашиот систем е сличен на оној во Грција, но сакаме да преминеме на отворен систем, каков што функционира во Србија. Ова ќе овозможи подобра контрола и побрзо движење низ автопатите,“ истакна Николоски.
Министерот дополнително појасни дека автопатската делница од Скопје до Охрид нема потреба од големи дополнителни инвестиции за воведување на ваков систем, бидејќи истата е во процес на изградба. Меѓутоа, за делницата од Табановце до Гевгелија, проектот бара значителни финансиски средства.
