Зголемувањето на минималната плата и порастот на платите во јавниот сектор во последните години придонесоа за пораст на просечната плата, но економскиот развој останува клучен предизвик, особено поради значителниот одлив на работна сила кој се забележува во моментот.
Според статистичките податоци, платите во изминатите 10 години се зголемиле за околу 94 проценти. Во 2014 година, просечната плата изнесувала 21.217 денари, додека во август оваа година достигнала 41.097 денари, што е еквивалентно на 668 евра.
И покрај овој раст, земјата сè уште има најниска просечна плата во регионот, и се наоѓа на дното на листата во Европа.
За споредба, во Србија просечната месечна плата е 836 евра, во Босна и Херцеговина 710 евра, во Црна Гора 861 евро, во Хрватска 1324 евра, а во Словенија 1495 евра.
