Фото: Принтскрин
Советот на Европската Унија и Европскиот парламент постигнаа договор за воведување на новиот Систем за влез/излез (EES), кој ќе значи крај за досегашното печатење пасоши при влез и излез од Шенген зоната.
По финализацијата на договорот, останува тој формално да биде одобрен од двете институции, по што Европската комисија ќе донесе одлука за почеток на неговата примена. Транзицискиот период ќе трае шест месеци.
Станува збор за централизирана електронска база на податоци која ќе ги евидентира сите влезови и излези на државјани на трети земји – како оние кои имаат обврска за виза, така и оние кои се ослободени од тоа.
Новиот систем ќе забележува кога, каде и во кое време некој ја минал надворешната граница на ЕУ, и ќе го пресметува дозволениот рок на престој. На тој начин, ќе се откриваат и алармираат прекршувања на дозволениот престој од максимум 90 дена во рок од 180 дена.
EES воведува и дигитално регистрирање на биометриски податоци, вклучително и фотографирање и земање отпечатоци од прсти при прв влез. Информациите ќе бидат чувани во електронска форма, со цел да се овозможи поефикасна гранична контрола и заштита од злоупотреба.
Во првите два месеци од транзицискиот период, системот ќе може да функционира и без биометриски податоци, додека по трет месец, најмалку половина од граничните премини ќе мора да користат биометриски алатки. До крајот на шестмесечниот период, се очекува целосна интеграција на системот на сите премини. За време на овој преоден период, печатите во пасошите сè уште ќе се користат паралелно.
