Од денеска започнуваат засилени инспекциски контроли во маркетите и другите трговски објекти, најави премиерот Христијан Мицкоски.
Според неговото соопштение, утрово одржал координациски состанок со министерот за економија и труд, претседателот на Комисијата за заштита на конкуренцијата и директорот на Државниот пазарен инспекторат, со цел преземање конкретни мерки за заштита на потрошувачите.
„Денеска почнуваме со чекори кои беа договорени на состанокот. Вчера, на прес-конференција, новинарите укажаа на два трговски ланци за кои постои сомнеж дека можеби не ги почитуваат законите и процедурите. Тие, заедно со други трговски субјекти, ќе бидат предмет на темелни проверки во наредните денови. Според нашите податоци, секој од овие супермаркети има околу 20.000 коминтенти, па потребна е детална анализа за да се утврди дали постојат неправилности. Во исто време, контроли ќе се вршат и во останатите трговски објекти, бидејќи заштитата на животниот стандард на граѓаните е наш приоритет, а Владата ќе преземе сè што е потребно за да го обезбеди тоа“, изјави Мицкоски.
