Пресудата за трагичниот масакр што се случи во основното училиште „Владислав Рибникар“ во Белград, на 3 мај 2023 година, е закажана за 30 декември, објавуваат српските медиуми. Настанот, во кој 13-годишно момче уби девет ученици и училишниот чувар, остави длабока трага во српското општество и покрена бројни прашања за безбедноста во училиштата и менталното здравје на младите.
Во своите завршни зборови пред судот, родителите на момчето извршител се оградија од неговиот чин, тврдејќи дека немале никаква улога или влијание врз неговата одлука.
„Тоа беше негова лична одлука, ние не знаевме ништо и немавме контрола над тоа. Секое утро се молам за душите на жртвите. Не сум виновен, го воспитав мојот син да биде добро дете,“ изјави Владимир Кецмановиќ, таткото на момчето.
Мајката, Миљана, со сличен тон изрази длабока тага за настанот, но одби да преземе одговорност за постапките на својот син. „Нема зборови што можат да ја опишат мојата болка за она што се случи. Не сакам повеќе да коментирам,“ изјави таа, пренесува српскиот портал „Блиц.“
Оваа трагедија, која го потресе регионот, отвори дебата за улогата на семејството, образовниот систем и општеството во спречување на вакви катастрофални инциденти.
