Трошоците за основните потреби на едно четиричлено семејство и натаму се високи. Во септември, вредноста на потрошувачката кошница достигнала 58.117 денари, што претставува намалување од 358 денари во споредба со август. Но, ако се направи споредба со почетокот на годината, се забележува поинаков тренд – од јануари досега, потребните средства за покривање на основните трошоци се зголемиле за 1.736 денари, односно за 3,1 процент.
Овие податоци биле презентирани на седницата на Економско-социјалниот совет, каде што, покрај трошоците за живот, се отвориле и прашањата за работните обврски во недела, неработните денови и евентуалното воведување четиридневна работна недела.
Министерот за економија и труд, Бесар Дурмиши, објаснил дека новиот начин на пресметување на потрошувачката кошница треба да овозможи појасна слика за реалните финансиски потреби на домаќинствата. Според него, ваквите податоци се важни за подготовка на економски и социјални мерки што ќе одговараат на потребите на граѓаните.
Пресметката се базира на 11 групи трошоци и опфаќа 101 прехранбен производ. При утврдувањето на вредноста се земаат предвид статистички податоци од осум градови, цените на овошјето и зеленчукот на 23 пазари, како и понудите на пет големи и три регионални трговски синџири.
Дурмиши посочил дека разликите меѓу одделните пресметки се резултат на различниот методолошки пристап, опфатот на производите и услугите, како и изворите од кои се прибираат податоците. Најзабележителни разлики се утврдени кај храната и пијалаците, облеката и обувките, образованието, домувањето и комуналните услуги. Од друга страна, кај издатоците за одржување на домот, рекреација и култура, методологијата на Министерството покажува повисоки износи.
Од Министерството очекуваат новата пресметка да придонесе за поаргументирани разговори меѓу институциите и социјалните партнери, со цел да се утврдат решенија за подобрување на животниот стандард и зачувување на куповната моќ на населението.
На истата седница биле разгледани и можните промени во организацијата на работното време, статусот на неделата како работен или неработен ден, календарот на неработни денови, воведувањето четиридневна работна недела и прашањата поврзани со пензискиот стаж. Според Дурмиши, за овие теми е неопходна дополнителна анализа и усогласување на ставовите меѓу работниците, работодавачите и институциите.
Веста ја пренесува Skopje1.mk
