Основното јавно обвинителство Скопје донесе наредба за спроведување истражна постапка против 26-годишен маж, кој се сомничи за извршување на серија кривични дела против имотот, меѓу кои разбојништва и тешки кражби.
Според наводите од обвинителството, осомничениот ги таргетирал своите жртви – претежно жени и малолетни девојчиња – на различни локации во општините Центар и Аеродром. Нападите биле насилни, а притоа на жртвите им биле одземани чанти, ранци, паричници, накит, мобилни телефони и други вредни предмети. Обвинителството посочува дека обезбедените докази укажуваат на основано сомнение дека тој е извршител на најмалку пет вакви кривични дела, преку кои се стекнал со противправна имотна корист проценета на околу 100.000 денари.
Поради сериозноста на делата и потенцијалната опасност осомничениот да избега, да влијае врз сведоците или да продолжи со извршување слични кривични дела, јавниот обвинител поднесе предлог до судијата за претходна постапка при Основниот кривичен суд Скопје за определување мерка притвор.
