Фото: Принтскрин
Велес го потресе сериозен инцидент што се случил синоќа, при што 30-годишна жена е приведена под сомнение дека се обидела да го лиши од живот својот вонбрачен сопруг.
Според информациите од Министерството за внатрешни работи, на 6 јули 2026 година, околу 19 часот, полициски службеници од СВР Велес ја лишиле од слобода Т.Д. (30) од Велес, поради сомнение дека во семејниот дом со остар предмет му нанела убодна повреда на својот 37-годишен вонбрачен партнер.
Повредениот веднаш бил пренесен во Општата болница во Велес, каде што му била укажана медицинска помош, додека осомничената била задржана во полициска станица.
При увидот, полицијата го пронашла и го одзела предметот со кој, според сомнежите, бил извршен нападот. За случајот бил известен јавен обвинител, а по завршување на истрагата и целосното документирање на настанот, против Т.Д. ќе биде поднесена кривична пријава за кривичното дело „обид за убиство при семејно насилство“, согласно член 123 во врска со член 19 од Кривичниот законик.
Веста ја пренесува Newz24live.com
