Русија одамна се соочува со сериозни демографски предизвици, а претседателот Владимир Путин јавно истакнува дека намалувањето на бројот на новороденчиња претставува закана за иднината на државата. Новите мерки од Москва, меѓутоа, предизвикаа жестоки реакции и поделби во јавноста. Сега, одлуката да не се има потомство повеќе не е само личен избор, туку повод за консултација со стручњак.
Од зборови кон дела
Руските власти одлучија да ги засилат активностите за подигнување на наталитетот, кој е најнизок во последните две столетија. Согласно новите здравствени протоколи за репродуктивни прегледи, секоја жена ќе биде прашана колку деца сака да има.
Доколку одговорот е „не сакам деца“, лекарите се советуваат да ја упатат жената на разговор со медицински психолог. Целта е да се работи на „позитивен став“ кон мајчинството и да се откријат психолошките бариери кои ја спречуваат желбата за потомство.
Овие упатства се донесени кон крајот на февруари, но сега станаа тема која ја привлекува вниманието на државните медиуми и јавноста.
Демографска криза: бројки кои загрижуваат
Состојбата во Русија е сериозна. Наталитетот се намалил на околу 1,4 деца по жена, далеку под критичната граница од 2,1 која е неопходна за природна обнова на населението.
Четиригодишната војна во Украина и мобилизацијата на стотици илјади млади луѓе уште повеќе ја влошија демографската слика. Во 2024 година, Путин предупреди дека Русија е на работ на „изумирање“ ако не се преземат итни мерки.
Забрана за „child-free“ пропаганда
Мерката за консултации со психолог е продолжување на конзервативната политика на Кремљ. Во Русија веќе е забрането промовирањето на животен стил без деца во медиумите и на интернет.
Пристапот до абортус станува се потежок и поограничен, а семејствата со повеќе деца се јавно величаат и добиваат значителни финансиски и социјални привилегии.
За Кремљ, големото семејство не е само традиција – тоа е стратешка алатка за заштита од демографскиот колапс кој може да ја оголи најголемата земја на светот.
Веста ја пренесува Redportal.rs
