Фото: Giorgio Armani
Со длабока тага модната групација „Армани“ ја соопшти смртта на својот основач и креативен лидер, Џорџо Армани. „Со бескрајна тага, групацијата Армани ја објавува смртта на својот творец, основач и неуморна движечка сила: Џорџо Армани,“ стои во официјалното соопштение.
Армани почина на 91-годишна возраст, оставајќи зад себе империја која стана синоним за елеганција, минимализам и италијански стил. Под негово водство, компанијата достигнуваше годишни приходи од над 2,3 милијарди евра, притоа задржувајќи го угледот на еден од најпрестижните модни брендови во светот.
Џорџо Армани е роден на 11 јули 1934 година во Пјаченца. Иако првично студирал медицина, по неколку години ја напуштил оваа насока и својата љубов ја пронашол во модата. Првите чекори ги направил како декоратор на излози во стоковната куќа „Ла Ринашенте“ во Милано, а потоа се усовршувал како дизајнер за Нино Черути.
Во 1975 година, заедно со својот деловен партнер Серџо Галеоти, ја основал „Armani S.p.A.“, компанија која наскоро стана препознатлива по елегантните и софистицирани кроеви. Армани ги револуционизираше машките костуми, воведувајќи нови стандарди на деловна елеганција, особено во текот на 1980-тите.
Под името „Армани“ се развија неколку брендови – „Џорџо Армани“, „Емпорио Армани“ и „Армани Ексчејнџ“. Освен облеката, неговото име го носат парфеми, часовници, линии за ентериери, па дури и луксузни хотели. Неговиот стил секогаш бил поврзуван со софистицираност, италијанска елеганција и безвременски луксуз.
Армани остави трага и во филмската индустрија, облекувајќи ги најголемите холивудски ѕвезди. Неговиот дизајн доби глобална препознатливост кога Ричард Гир во филмот „Американски жиголо“ (1980) носеше костуми токму од Армани – момент што засекогаш го врежа неговото име во светската поп-култура.
Фото: Giorgio Armani
