По речиси три часа вчера заврши подготвителното рочиште во Вишиот суд во Неготин за случајот со трагичната смрт на двегодишната Данка Илиќ. Родителите на девојчето, Ивана и Милош Илиќ, за првпат се најдоа во иста судница со Дејан Драгијевиќ и Срѓан Јанковиќ, кои се обвинети за нејзиното тешко убиство.
Според информациите од судењето, двајцата обвинети не ја признале вината за делото што им се става на товар. По завршувањето на рочиштето, тие биле вратени во притвор под засилени безбедносни мерки.
Нивното изнесување од судската зграда било организирано преку спореден влез, со цел да се избегне контакт со бројните новинарски екипи кои го следеле случајот. Обвинетите биле спроведени одделно, под придружба на полицијата и затворската стража.
Родителите на малата Данка пристигнале во судот со службено возило, а и нивното внесување во зградата било проследено со засилено обезбедување. По рочиштето, тие ја напуштиле судницата видно потиштени.
Судењето овојпат се одржало зад затворени врати, согласно вообичаената процедура за подготвителната фаза од кривичната постапка. На рочиштето страните имале можност да ги претстават своите почетни ставови, како и да предложат докази и сведоци што би биле разгледани во текот на главниот судски процес.
Драгијевиќ и Јанковиќ се товарат за тешко убиство извршено во соизвршителство. Вишото јавно обвинителство во Заечар претходно предложило за двајцата да биде изречена казна доживотен затвор.
Според обвинението, на 26 март 2024 година, во Бањско Поле кај Бор, двајцата наводно со службено возило на јавното комунално претпријатие „Водовод“ ја удриле двегодишната Данка. Потоа, според обвинителните наводи, ја ставиле во автомобилот и ја усмртиле, а нејзиното тело го оставиле на депонија.
И покрај досегашната истрага, телото на малото девојче сè уште не е пронајдено.
Особено внимание во случајот предизвикуваат и промените во исказите на обвинетите. Имено, по апсењето тие дале изјави во кои ја признале својата вмешаност, но подоцна ги смениле исказите и почнале да го негираат извршувањето на кривичното дело.
Веста ја пренесува Kurir.rs
