Тажна вест го потресе фудбалскиот свет. Португалскиот фудбалер Даниел Гонсалвеш почина на 25-годишна возраст, откако речиси една година се наоѓаше во кома по тешкиот здравствен инцидент што го доживеа во септември минатата година.
Веста за неговата смрт ја потврди полскиот клуб Полонија, каде што настапуваше пред трагичниот настан.
Кошмарот за младиот фудбалер започнал по еден тренинг во септември 2025 година, кога доживеал срцев удар. Веднаш бил пренесен во болница, каде што лекарите се бореле за неговиот живот, а тој бил сместен на одделението за интензивна нега.
Иако во одреден период се појавиле надежи за подобрување, откако успеал да дише самостојно без поддршка од апарати, неговата здравствена состојба не напредувала значително. По долга и тешка борба, неговиот живот згаснал.
Гонсалвеш беше фудбалер кој ветуваше, а во својата кариера имаше можност да биде дел и од младинските категории на славната Бенфика. Потоа кариерата го однесе во Норвешка, каде што го носеше дресот на Лилехамер, пред да се пресели во Полонија, клуб кој се натпреварува во четвртиот ранг на полскиот фудбал.
По трагичната вест, неговото семејство се соочува со уште еден тежок предизвик. Започната е кампања за собирање донации со цел посмртните останки на младиот фудбалер да бидат пренесени од Полска во неговата родна Португалија.
Животот на Гонсалвеш згасна прерано, оставајќи зад себе голема тага кај семејството и сите што го познавале.
Веста ја пренесува Sport1.mk
