Поранешниот грузиски репрезентативец Рати Мсхвилидзе го загуби животот по ненадеен срцев удар во трговски центар во Тбилиси. И покрај обидите да му биде укажана помош, неговиот живот не можел да биде спасен.
Тажна вест го потресе ракометниот свет. Рати Мсхвилидзе, некогашен член на македонскиот клуб Еурофарм Работник и поранешен репрезентативец на Грузија, почина на 40-годишна возраст по ненадејни здравствени компликации.
Несреќниот настан се случил на 19 октомври во трговскиот центар „Глдани“ во грузиската престолнина Тбилиси. Според пишувањата на тамошните медиуми, на поранешниот ракометар ненадејно му се влошила здравствената состојба, по што почувствувал силни болки.
Во потрага по помош, Мсхвилидзе влегол во аптека во рамките на трговскиот центар. Сепак, и покрај напорите да му се помогне, тој починал на местото на настанот. Како причина за смртта е наведен срцев удар.
Неговото име е познато и меѓу љубителите на ракометот во Македонија. Во текот на својата играчка кариера, тој настапуваше за Еурофарм Работник од Битола, клубот што претходеше на денешниот Еурофарм Пелистер.
Покрај македонското искуство, грузискиот ракометар играше и во странство. Беше дел од српска Металопластика од Шабац во сезоните 2009/2010 и 2010/2011, а настапуваше и за исландскиот Стјарнан и турскиот Трабзон.
Мсхвилидзе остави белег и во националниот тим на Грузија. За својата репрезентација одигра 28 официјални натпревари, на кои постигна вкупно 112 голови.
По повлекувањето од професионалното играње, остана поврзан со ракометот, насочувајќи се кон тренерската професија и работата со млади играчи.
Веста за неговата смрт ја потврди и Металопластика, од каде што упатија сочувство до неговото семејство, пријателите и сите што имаа можност да го познаваат и да соработуваат со него.
Неговото прерано заминување претставува голема загуба за семејството и за ракометната заедница, во која ќе остане запаметен по својата играчка кариера и придонесот во спортот.
Веста ја пренесува Newz24live.com
