Токсичната „риба зајак“ станува сè почеста глетка во водите на Егејското Море, покажуваат најновите анализи на грчката научна мрежа ELNAIS. Според објавената интерактивна мапа, инвазивниот вид повеќе не е изолирана појава, туку е присутен во голем дел од регионот, особено околу Крит, Кикладите и Додеканезите.
Оваа риба, научно позната како Lagocephalus sceleratus, во Средоземното Море пристигнала преку Суецкиот Канал. Благодарение на поволните услови за размножување, нејзината бројност значително се зголемила, што според научниците претставува сериозен предизвик за природната рамнотежа во морето.
Освен што ги загрозува домашните видови риби и другите морски организми, „рибата зајак“ претставува и ризик за луѓето. Нејзиното месо содржи опасен токсин кој може да предизвика сериозни последици по здравјето доколку се консумира. Паралелно со тоа, рибарите се соочуваат со сè поголеми загуби, бидејќи овој вид ги оштетува рибарските мрежи и го уништува уловот.
Податоците покажуваат дека најголема концентрација е забележана во водите околу островот Крит, но присуството на овој вид е потврдено и на многу други локации во Егејското Море. Поради тоа, експертите советуваат дополнителна внимателност кај сите што летуваат или планираат активности на море во овој регион.
За да се намали влијанието на инвазивниот вид, Грција веќе спроведува мерки за негово контролирање и отстранување. Во слични акции се вклучени и Кипар, како и други држави од источниот Медитеран, кои се обидуваат да го ограничат понатамошното ширење и да ги заштитат морските екосистеми.
Веста ја пренесува Skopje1.mk
