Здружението „Проект среќа“, основано од пејачката Кристина Арнаудова, започна иницијатива за собирање бенкици и бебешка облека за новороденчиња до три месеци. Акцијата следува по големиот интерес во јавноста, откако беше објавено сведоштво на родилка која тврдеше дека своето бебе првпат го видела облечено во оштетена бенкица.
Од здружението информираа дека веќе воспоставиле комуникација со раководството на Клиниката за гинекологија и акушерство (ГАК) и дека добиле позитивен одговор за идна соработка. Во наредниот период ќе бидат објавени детали за начинот на собирање и распределба на донациите.
„Проект среќа“ ги повика сите граѓани кои имаат зачувана и употреблива бебешка облека за возраст од 0 до 3 месеци да се приклучат кон акцијата. Поради тоа што здружението моментално нема свои простории, дополнително ќе бидат соопштени локацијата и термините за прием на донациите, по што облеката ќе биде доставена до клиниката.
Од здружението нагласуваат дека нивната цел не е поддршка на институциите, туку обезбедување подобри услови за новороденчињата и нивните семејства.
Во меѓувреме, родилката која ги објави фотографиите од своето новороденче изјави дека нејзината намера не била да ја дискредитира клиниката, туку да укаже на недостатоците и да поттикне подобрување на условите.
Таа посочи дека дел од медицинскиот персонал бил професионален и посветен, особено при советувањето за доење, но истовремено наведе дека во болничките соби забележала нехигиенски услови, како и присуство на лебарки. Според неа, санитарните јазли не биле соодветно одржувани, а во дел од собите недостасувале тоалетни даски.
Родилката смета дека институцијата треба навремено да ги отстранува ваквите недостатоци наместо одговорноста да ја префрла врз пациентите. Таа истакна дека, покрај вложувањата во нова медицинска опрема, неопходно е континуирано да се инвестира и во обука на персоналот за професионална комуникација, етика и човечки однос кон родилките.
Според неа, ГАК е една од најважните здравствени установи во државата и заслужува да го зачува својот углед преку подобри услови за пациентите и повисоко ниво на грижа.
Во своето обраќање таа потенцираше дека бројните сведоштва на родилки на социјалните мрежи укажуваат дека станува збор за реални проблеми, а не за изолирани случаи. Затоа апелираше раководството на клиниката внимателно да ги разгледа забелешките и да преземе конкретни мерки за подобрување на хигиената, организацијата и односот кон пациентките.
Акцијата за донирање бебешка облека веќе наиде на голем одѕив, а организаторите очекуваат со поддршка од граѓаните да се обезбедат доволно бенкици и неопходна облека за новороденчињата кои се згрижуваат на Клиниката за гинекологија и акушерство.
Веста ја пренесува Слободен печат.
Фотографии:Проект Среќа.
