Стојанче Ангелов, директор на Дирекцијата за заштита и спасување, на денешната прес-конференција соопшти дека е постигнат договор со кој секое доброволно противпожарно друштво однапред ќе го декларира бројот на доброволци што ќе бидат веднаш достапни за интервенција во случај на пожар.
Како што истакна Ангелов, се прави значајна промена во начинот на организација и координација, при што наместо преку локални ограноци, целиот систем ќе функционира централизирано во рамки на Дирекција за заштита и спасување.
Тој појасни дека ќе бидат назначени одговорни лица кои ќе делуваат по принцип на јасна командна, „пирамида“ структура, преку која ќе се воспоставува директна комуникација и брза мобилизација на терен.
Според најавите, преку еден повик ќе може да се ангажираат 10, 20 или 30 доброволци, а во услови на поголеми пожари системот ќе овозможи и дополнително засилување со нови сили, зависно од потребите на теренот.
