Во тешка несреќа што се случи во средата претпладне на швајцарското скијалиште Титлис, една гондола се урна во провалија, при што загина едно лице.
Инцидентот се случил нешто по 11 часот, по што веднаш била активирана обемна спасувачка операција. Во акцијата учествувале и два хеликоптери кои се обидувале да стигнат до местото на падот.
Според информациите од полицијата, во моментот на несреќата во гондолата се наоѓало едно лице. Иако спасувачите се обиделе да го реанимираат на самото место, лицето им подлегнало на повредите. Неговиот идентитет засега не е официјално потврден.
Драматични снимки од местото на настанот покажуваат како гондолата неконтролирано се тркала по стрмниот терен, додека спасувачките екипи се борат да спасат живот.
Евакуацијата на останатите патници од жичарницата траела околу три часа. И покрај силниот ветер што дувал во тој момент – кој се смета за можен причинител на несреќата – системот бил во функција.
„Причините за несреќата сè уште не се утврдени. Истрагата е во тек“, изјави претставник на кантоналната полиција.
Скијалиштето Титлис важи за едно од најголемите во централна Швајцарија, со десетици километри скијачки патеки.
Сведок на несреќата раскажал дека за малку ќе се качел во гондолата која паднала, но поради одлука да почекаат следна тура, избегнал трагедија.
„Имаше силен ветер. Ние бевме четворица во гондолата. Се тресеше, сајлата кратко попушти, а потоа сè застана“, изјавил сведокот, кој во моментот на разговорот сè уште бил заглавен во жичарницата.
Веста ја пренесува Dnevnik.hr
