Истражните органи во Белград интензивно работат на расветлување на експлозијата што утрово се случи пред семејната куќа на познатиот пејач Здравко Чолиќ, а еден од правците на истрагата води кон лице од естрадните кругови, дознаваат српските медиуми од извори блиски до случајот.
Според досегашните сознанија, се сомнева дека нападот бил нарачан од познат естраден менаџер, додека самиот извршител е друго лице. Полицијата веќе обезбедила материјални докази, извршен е увид на местото на настанот, а се анализираат и снимки од безбедносни камери, како и изјави од сведоци.
Увидот го извршиле припадници на полицијата заедно со дежурен јавен обвинител од Вишото јавно обвинителство, а истрагата траела неколку часа.
Во експлозијата, за среќа, нема повредени, но причинета е значителна материјална штета. Оштетена е фасадата на куќата, скршени се стакла, а експлозивната направа оставила траги и на дворот пред влезот.
Според неофицијални информации, станува збор за рачна бомба, а мотивот, како што се претпоставува, не бил физичка ликвидација, туку испраќање порака или обид за заплашување на пејачот и неговото семејство.
Изворите наведуваат дека Чолиќ и лицето за кое се сомнева дека стои зад нападот, во минатото биле во блиски деловни и пријателски односи, што дополнително го усложнува случајот. Иако станува збор за човек со углед во естрадните кругови, неговото име, според истрагата, и претходно се поврзувало со различни инциденти.
Во моментот на експлозијата, во куќата наводно се наоѓала помладата ќерка на Чолиќ, додека пејачот бил надвор од државата.
Истрагата продолжува, а надлежните институции најавуваат дека во наредните денови се очекуваат нови детали.
