Во манастирот „Свети Ѓорѓи Победоносец“ во Рајчица, Дебарско, пристигна дел од моштите на големиот христијански светител Свети Василиј Велики. Реликвијата е подарок од Православната црква на Романија и ја предаде јеромонахот Стефан Симион, игумен на манастирот на светиот пророк Илија во регион Лацио, Италија.
Автентичноста на моштите е потврдена со оригиналните печати на Ватикан, видливи под самите мошти и на реликвијарот во кој се положени. Според објаснувањата од манастирот, реликвијата ќе остане трајно во Рајчица, каде верниците ќе можат да им се поклонат и да ја почувствуваат духовната врска со светиот.
Свети Василиј Велики, роден во 330 година во Неокесарија во Понт, починал во 379 година и е познат како столб на Црквата и поборник на православната вера. Тој е основач на монашката традиција во Источното православие и се смета за пример на морална чистота и духовна посветеност. Верниците го одбележуваат неговиот празник на 14 јануари, наречен Василица, или Стара Нова година. Дел од неговите мошти се чуваат и во црквата „Свети Кирил и Методиј“ во Струмица.
