Заменик-министерот за образование и наука, Љулзим Алиу, денеска официјално соопшти дека поднесува неотповиклива оставка од функцијата што ја извршуваше. Одлуката ја објави јавно преку социјалните мрежи.
Оставката е доставена до премиерот Христијан Мицкоски, а Алиу нагласи дека повлекувањето е резултат на внимателна лична и професионална проценка.
Според неговото образложение, во овој момент смета дека е вистинско време да се посвети на академската и научно-истражувачката работа, како и на семејните обврски.
„Со ова писмо Ве информирам дека поднесувам неотповиклива оставка од позицијата заменик-министер за образование и наука. Одлуката е донесена по темелна лична и професионална анализа, со уверување дека во овој период мојот придонес е најпотребен во академската сфера, научната дејност и семејството“, напиша Алиу во објавата.
Тој упати благодарност до Владата за укажаната доверба и можноста да ја извршува оваа одговорна функција, посакувајќи им успех во понатамошната работа.
Алиу е дел од коалицијата ВРЕДИ, односно партијата Алтернатива, и во своето обраќање изрази благодарност и до партиското раководство, вклучувајќи го актуелниот претседател Беким Али, како и поранешните лидери Африм Гаши и Зеќирија Ибрахими.
