Јована Алексиќ од Трстеник ќе стане првата жена од Србија која ќе ја добие новата, персонализирана руска терапија против рак на кожа. Лекувањето во Москва чини 100.000 евра, а за да може целосно да ја продолжи терапијата, ѝ недостигаат уште 65.000 евра.
Нејзината борба започнала во 2018 година, кога во петтиот месец од бременоста забележала сомнителен младеж на левата рака. По неколку месеци бил хируршки отстранет и тогаш се чинело дека проблемот е решен. Но, минатата година лекарите откриле метастази на белите дробови и мозокот – момент што целосно го променил нејзиниот живот.
– Пет пати бев третирана со гама нож, поминав низ бројни имунотерапии, но промените постојано се враќаа. Последната надеж ми е руската вакцина. Верувам дека од Русија ќе се вратам како победник – раскажува Јована.
Во моментот кога ѝ била поставена дијагнозата, имала само 26 години.
Неколку месеци по породувањето се јавила кај дерматолог во Пирот, градот каде што се омажила. Лекарите препорачале итно отстранување на младежот, а примерокот бил испратен на анализа во Ниш. По три недели стигнала дијагнозата што ја шокирала целата фамилија – малигнен меланом.
– За рак на кожа речиси ништо не знаев. Не можев да прифатам дека тоа ми се случува мене – се присетува таа.
Лекувањето продолжило во Белград, на Институтот за онкологија и радиологија. Во 2018 година, превентивно ѝ биле отстранети лимфните јазли под левата мишка, а контролите подолго време покажувале добри резултати.
Сѐ се променило во 2024 година, кога при редовен преглед била откриена метастаза на десното белодробно крило. Подоцна, магнетната резонанца на мозокот покажала дури 15 метастази.
– Знаев дека состојбата е сериозна, но не можев да се помирам со тоа. Само една недела подоцна, бројот се зголеми на 17 – вели Јована.
Следела терапија со гама нож – најпрво биле зрачени најголемите тумори, а потоа и помалите. Паралелно примала имунотерапија во Ниш. Во почетокот резултатите биле охрабрувачки, метастазите се намалувале, а таа се чувствувала подобро.
Но, во февруари и март се појавиле нови промени.
– Вкупно пет пати бев третирана со гама нож, но поради постојаното појавување нови метастази, лекарите се откажаа од тој пристап. Потоа примив и четири циклуси имунотерапија од Турција, но без успех. Во еден момент имав дури 53 метастази на мозокот – раскажува таа.
И покрај сè, не се откажала. Во потрага по решение, дознала за новата руска вакцина. Преку проф. д-р Владимир Јаковљевиќ од Факултетот за медицински науки во Крагуевац, кој соработува со руски научници, ја испратила целата медицинска документација и аплицирала за терапијата.
Одговорот од Москва бил позитивен – прифатена е за лекување. Но токму тогаш состојбата нагло ѝ се влошила. Метастазите отекле и почнале да го притискаат мозокот – не можела да зборува, да стои, ниту да јаде.
По терапија со кортикостероиди, состојбата се стабилизирала и кон крајот на ноември заминала за Москва.
– Таму ми направија детални испитувања, повторно ја проверија биопсијата и зедоа примероци од ткиво за изработка на персонализираната вакцина. Терапијата треба да започне во јануари – вели Јована.
Цената на лекувањето изнесува 100.000 евра и ги опфаќа вакцините, терапиите, медицинските прегледи, превод на документацијата и трошоците за сместување. Со помош на семејството и пријателите веќе се собрани 35.000 евра, но за продолжување на лекувањето недостигаат уште 65.000.
– Моја најголема сила е мојот осумгодишен син. Поради него нема откажување. Во Русија се уверив колку се посветени и стручни лекарите. Верувам дека ме чека нов почеток – порачува таа.
Проф. д-р Владимир Јаковљевиќ истакнува дека состојбата е сериозна, но дека очекува позитивен исход. Според него, цената на терапијата моментално е коригирана и изнесува 190.000 евра по пациент, но постои можност пациентите кои влегле во постапка порано да ја платат пониската цена.
– Станува збор за високо софистицирана и нова технологија. Со нејзиното воведување во редовната клиничка пракса, цената ќе биде значително пониска – додава тој.
