Фото: Амела Мемиш Апостоловска
Мајката на Леон, Амела Мемиш Апостоловска сподели фотографии и видео од Веселиот Дедо Мраз кој го посети и израдува нејзиниот син.
„Мал чекор ,но за нас голем успех. Доказ дека ветувањата дадени со љубов се исполнуваат, и дека надежта секогаш наоѓа пат до детското срце.
Кога би можела, со целото срце би го вратила твојот дедо мојот татко, човекот кој ни недостасува длабоко, таму каде што болката не се гледа, туку се живее. Но, мило мое, има работи што ниеден човек не може да ги направи. Затоа, јас, тато и Дедо Мраз решивме барем малку да ја ублажиме твојата болка… и нашата.
Вечерва, кога го прими подарокот, ја видов среќата во твоите очи. Ја почувствував твојата душа како заигра од радост. Но видов и нешто друго тагата што тивко стоеше таму, искрена и длабока. Видов колку ти значеше дедо ти. Истиот оној начин на кој значи и за мене.
Затоа ти ветувам, сине: никогаш нема да биде заборавен. Неговата желба беше да нè види како успеваме, како одиме напред. И токму затоа, во негова чест, ќе го продолжиме патот овој пат уште посилни.
Ти го носиш неговиот лавовски карактер. Неговата цврстина, љубов и добрина. Тоа се дарови што не му се дадени на секого. Јас изгубив родител, ти изгуби дедо. За некого тоа се само зборови. За нас тоа е нешто свето. И така ќе го носиме во срцето, и за него ќе чекориме храбро, рака за рака, без да се пуштиме.
И да знаеш, сине, мама повеќе нема да биде иста. Овој пат ќе биде посилна од кога било. По оваа средба, по твоите зборови што излегоа од твојата уста зборови што за мене вредат повеќе од злато знам дека растеш во нешто големо и чисто.
И запомни дека сега и тој е со нас. Во секој наш чекор. А со нас е и Бог, Кој ни го осветлува патот, затоа што чекориме со чисто срце и љубов. Таму каде што оди љубовта, Господ чекори заедно со неа, и нема сила на земјата што може да ја покори.
Можеби ќе нè критикуваат. Можеби ќе коментираат. Можеби ќе се обидат да нè сопнат. Но тоа не се Божји луѓе, сине. Не застанувај на тие каменчиња. Прескокни ги. Остави ги зад себе. Како што велеше дедо ти подобро секогаш ќе најдеш пред себе“, објави Леон.
