Утре православните верници ќе го одбележат празникот Воведение во храмот на Пресвета Богородица, познат во народот како Пречиста, кој се слави на 4 декември. Овој ден е еден од најзначајните празници во православната традиција.
Според преданието, Пресвета Богородица, заедно со своите родители Јоаким и Ана, на тригодишна возраст за првпат влегла во храмот во Ерусалим. Родителите, кои дале завет дека детето ќе биде посветено на Бога, ја однеле таму каде што Марија сама се искачила по 15-те скали до врвот. Првосвештеникот Захарија, татко на свети Јован Крстител, ја вовел Марија дури и во Светињата над светиите, просторија каде што вообичаено влегувал само поглаварот на свештенството еднаш годишно.
Откако родителите принесле жртва и добиле благослов, Марија останала да служи во храмот цели девет години. По смртта на Јоаким и Ана, таа сакала да живее девствено во храмот, но законите на тогашното време наложувале на 12-годишна возраст да биде доверена на свети Јосиф како свршеница, со цел да остане во девственост и формално да го исполни законот. Марија се смета за првата девојка која дала доживотен завет, а нејзиниот пример подоцна бил следен од илјадници вернички.
Бидејќи празникот се паѓа во рамки на Божиќниот пост, дозволено е консумирање риба и масло. Особено значајно, празникот има и посебна симболика за жените – во минатото се верувало дека оние кои долго време не можат да добијат потомство треба да се помолат и да преноќат во црква, со надеж дека Бог ќе им ја исполни желбата.
