„Лука е на интензивна нега“: Таткото на настраданите момчиња во Србија со прва изјава од болница

Тешка трагедија се случи во ноќта меѓу 28 и 29 октомври на автопатот Нови Сад – Белград, кога младо момче го загуби животот, а уште осум лица беа повредени откако комбе со млади џудисти излетало од коловозот и се превртело покрај патот. Починатиот е 16-годишен спортист, член на екипата на Партизан, која се враќала од меѓународно натпреварување.

Таткото на трагично загинатиот тинејџер накратко проговори за медиумите. Тој потврди дека неговиот втор син се опоравува и е во стабилна состојба.

„Сега сме во Институтот за судска медицина. Лука е на интензивна нега, но е подобро и закрепнува. Ве молам за разбирање, моментално не можам да давам изјави,“ изјави скршениот родител.

Меѓу повредените се возачот на комбето, 43-годишен маж, и уште седум малолетни спортисти. Несреќата се случила недалеку по излегувањето од наплатната рампа, но точната причина сè уште не е позната. Новинарски екипи беа на терен, а фотографија од превртениот комби-возилo покажува сцена на огромна штета и паника.

Младите џудисти се враќале од натпревар во Баку, Азербејџан, каде освоиле повеќе медали.