Издавачката куќа „Матица македонска“ ја претстави новата монографија на Доне Таневски под наслов „Монетоковањето на градовите во античка Македонија“. Станува збор за исклучително значајно научно издание од повеќе од 500 страници, во кое детално се обработуваат градските заедници (полиси), нивниот историски развој, економско-политичките текови, како и најважно — нивната монетарна активност. Делото ја опфаќа целата територија на античка Македонија, односно областите и градовите што некогаш биле дел од неа и нивната продукција на монети.
– И покрај сите предизвици што ги носи обработката на ваква тема, оваа монографија претставува прв и редок труд од ваков вид во нашата земја. Во неа се опфатени над четириесет антички градови, чија монетарна продукција е прикажана на прегледен и стручен начин. Историската рамка е внимателно вклучена за полесно разбирање на нумизматичките процеси и појави, се наведува во рецензијата на нумизматичарите Перо Јосифовски и Милица Шелдарова Василева.
Од самиот материјал може да се забележи посветеноста и деталноста на Таневски во утврдувањето на хронологијата и историската интерпретација на градските монетарни изданија. Авторот ги следи фазите на појавата на монетите, нивната типологија, иконографија, тежински стандарди и историски околности под кои функционирале градските ковници. Хронолошкиот опфат почнува од крајот на VI век пр.н.е., преку класичниот период, па сè до ранохеленистичкото време во првата половина на III век пр.н.е., кога оваа дејност постепено згаснува, освен во случаи кога била под кралска контрола.
Како што забележуваат рецензентите, делото отвора нова страница во проучувањето на градското монетоковање во античка Македонија, тема која долго време предизвикувала интерес кај пошироката и стручната јавност.
– Со својата прецизна структура и научна обработка, книгата претставува драгоцен извор не само за љубителите на историјата и нумизматиката, туку и за истражувачите и академската заедница. Публикацијата ќе стане задолжително помагало и прирачник за сите што ја проучуваат оваа област, се истакнува во рецензијата.
Ова е втората обемна и значајна монографија на Таневски посветена на нумизматиката. Неговата претходна книга, „Монетоковањето во античка Македонија“, исто така објавена од „Матица македонска“ во 2019 година, беше дочекана како важен момент во развојот на македонската нумизматичка наука.
Неколку години подоцна, со новата монографија „Монетоковањето на градовите во античка Македонија“, авторот уште повеќе ја проширува и надградува својата научна работа, дополнително осветлувајќи ја историјата на печатењето и употребата на монети во античките македонски градови. Двете книги, иако обработуваат различни аспекти – кралското и градското монетоковање – заедно создаваат целина која може да се смета за мала енциклопедија на македонската нумизматика. Тие претставуваат своевидни прирачници и водичи низ монетарното наследство на античка Македонија, заклучуваат Јосифовски и Шелдарова Василева.
За сите кои сакаат да го поседуваат ова значајно дело и да ја видат вековната историја на Македонија преку монети, книгата може да се нарача на Вибер: 079 404 449 – испорака низ целиот свет.
