Познатиот автомобилски клуб „Speed Sector“, еден од водечките европски клубови за спортски автомобили, на тркачката патека во Серес, Грција, одржа емотивен момент во чест на својот починат член Душко Чифлиганец.
„На ова издание на Racetrack Experience едно место недостасуваше, но духот на Душко беше со нас. Заедно со сите учесници ја формиравме буквата ‘D’ на стартната линија – мала, но голема чест за еден исклучителен пријател. Засекогаш дел од нашето патување“, објавија од клубот на Instagram.
На фотографијата што ја сподели Speed Sector се гледаат учесниците како стојат во форма на буквата „D“, додека зад нив се редат спортските автомобили на стартната линија.
Speed Sector е меѓународна заедница која ги собира љубителите на брзината и спортските автомобили. Членовите, сопственици на уникатни возила, учествуваат на посебни тркачки настани и патувања низ Европа, споделувајќи ја својата страст кон возењето.
Душко Чифлиганец (1993–2025) загина на 32-годишна возраст во сериозна несреќа за време на мотоциклистичка трка во Брно, Чешка. Тој изгуби контрола над мотоциклот и излета од патеката, зад себе оставајќи тешки повреди, особено на главата.
Чифлиганец беше заменик-претседател на „Адора Бизнис Групација“, син на познатиот македонски бизнисмен Ванчо Чифлиганец, како и страствен мотоциклист кој освоил повеќе признанија. Несреќата се случи на 3 август 2025 година.
