Фото: Catedrala Națională
На 26 октомври во срцето на Букурешт ќе се одржи свеченото осветување на Соборен храм кој ќе биде најголемата православна црква во светот и едно од најимпозантните верски зданија на современото време. Чинот на осветување ќе го предводи патријархот на Романската православна црква, Даниел, заедно со вселенскиот патријарх Вартоломеј.
Со овој историски настан се заокружува проект кој во романското општество се смета за симбол на духовно обновување и национално единство. „Ова е духовен дом на целата Романија – место на молитва, благодарност и заедништво,“ изјави патријархот Даниел во пресрет на големиот ден.
Катедралата е изградена на рид, веднаш до зградата на парламентот, и доминира над панорамата на романската престолнина. Висината на централната купола заедно со крстот достигнува 135 метри, што ја прави највисоката православна црква во светот. Во нејзината внатрешност може да се соберат повеќе од седум илјади верници.
Комплексот е долг 126 метри и широк речиси 68 метри, изведен во неовизантиски стил со пет масивни куполи, величествени мозаици и современо осветлување што ја нагласува монументалноста на просторот.
Идејата за изградба на национална катедрала се појавила уште по Романско-ослободителната војна во 1877 година, како знак на благодарност за стекнатата независност и како симбол на духовното единство на народот. Но политичките промени, двете светски војни и долгите години под комунистички режим ја одложувале реализацијата сè до 2010 година, кога конечно започнало градењето.
Првиот значаен настан во недовршениот храм се случи во 2018 година, кога патријарсите Даниел и Вартоломеј го осветија олтарот.
Покрај својата богослужбена улога, катедралата има и културно-национално значење. Во рамките на комплексот се наоѓа музеј на Романската православна црква, библиотека, сала за духовни и образовни настани, како и простор за прием на верници.
Архитектите нагласуваат дека во ова монументално здание се спојуваат древната византиска традиција и современите технолошки иновации – жив доказ дека православието и во 21 век може да говори со моќен и современ израз, задржувајќи ја својата суштина.
