ВМРО-ДПМНЕ излезе со соопштение во кое ја коментира состојбата на градоначалничката Данела Арсовска и моменталната ситуација во Град Скопје.
„Додека Данела Арсовска сака да биде инфлуенсерка и троши време на театар, градските претпријатија штрајкуваат, а вработените со месеци немаат примено плата. Градот Скопје се наоѓа на работ на колапс“, стои во реакцијата на партијата.
Во продолжение, од ВМРО-ДПМНЕ наведуваат дека со разбирање пристапуваат кон личната состојба на градоначалничката:
„Со длабоко разбирање за состојбата во која се наоѓа и за предизвиците од лична природа на кои е изложена, нема да ја коментираме Данела Арсовска. Ѝ посакуваме добро здравје и брзо опоравување. Од разговорите со експерти кои ги консултиравме, јасно ни беше укажано дека нејзиното однесување е надвор од нејзината волја и посилно од неа.“
Партијата апелира јавноста да не ја осудува за емотивните изблици, но и потенцира дека тие не се соодветни за личност што ја извршува највисоката градска функција.
„Се надеваме дека ќе се избори со предизвиците што ја оптоваруваат, иако ова однесување не доликува на дама, а зборовите и пцовките не се нормални. Граѓаните ги повикуваме да не ја осудуваат за ова“, наведуваат од ВМРО-ДПМНЕ.
Според партијата, неработењето и грешките во водењето на градот се едно прашање, а ваквите емотивни реакции се сосема друго:
„Очигледно функцијата ѝ беше преголем товар, не се снајде, направи серија пропусти и соработуваше со луѓе од сомнителен карактер, поврзани со ДУИ. За жал, таквата соработка создаде конфликти и тензии кои се одразија врз функционирањето на градот.“
Од ВМРО-ДПМНЕ признаваат дека направиле грешка во проценката кога ѝ ја дале поддршката, но велат дека извлекле важна поука:
„Нашата намера беше добра, водени од интересот на скопјани. Сепак, направивме погрешна проценка. Во иднина тоа нема да се повтори. Скопје заслужува стабилност, работа и проекти кои ќе бидат гордост за сите граѓани.“
На крајот, партијата најавува дека по завршувањето на нејзиниот мандат ќе се спроведе темелна ревизија на целото работење на градот.
„Ревизијата ќе ја покаже вистинската слика и причините за многу одлуки, настани и однесувања. На Арсовска, како личност, ѝ посакуваме брзо закрепнување и излез од оваа емотивна и тешка ситуација во која се наоѓа“, стои во завршниот дел од соопштението на ВМРО-ДПМНЕ.
