Голема вознемиреност се прошири меѓу студентките во државниот студентски дом „Гоце Делчев“ во Скопје, откако било откриено дека непознат манијак тајно ги фотографирал додека се тушираат. Според информациите што ги добиле преку претседателката на Советот на станари, случајот се случувал во блокот А, на 12 кат, каде што лицето користело мобилен телефон поставен над параванот за да ги сними девојките.
Инцидентот се случил завчера, околу 17 часот, кога станарите го забележале осомничениот во моментот на фотографирање. Веднаш била известена управата на домот и полицијата, кои реагирале на местото на настанот. При преглед на телефонот биле пронајдени повеќе фотографии од студентки кои престојуваат во домот.
Во Вибер групата наменета за жителите на домот, се појавило предупредување до сите студентки доколку забележале нешто сомнително или почувствувале дека се снимани, веднаш да пријават.
Министерството за внатрешни работи го потврди инцидентот за нашата редакција.
„На 16 октомври 2025 година, околу 20:10 часот, 22-годишна студентка од Прилеп, која престојува во студентски дом во Карпош, пријавила дека додека се туширала забележала телефон поставен над параванот. Според пријавата, А.М. (22) од Богданци признал дека ги направил фотографиите. Лицето е приведено, а полицијата му одзела лаптоп и компјутер. Се преземаат дополнителни мерки за целосно расчистување на случајот“, соопштија од МВР.
