Министерот за здравство, Азир Алиу, денеска престојуваше во својот роден Гостивар, каде што го посети одделението за епидемиологија и лично се вакцинираше против сезонски грип.
„Со сопствен пример сакам да ја нагласам важноста на навремената вакцинација, која претставува најбезбедна и најефикасна заштита од грипот. Ги повикувам сите граѓани, особено оние од ризичните групи, навреме да се пријават за вакцинација преку платформата vakcinacija.mk или кај својот матичен лекар,“ изјави министерот Алиу.
Според податоците на Министерството, досега за вакцинација против сезонски грип се пријавиле околу 49.000 граѓани, а само во првиот ден биле вакцинирани повеќе од 2.000 лица.
„Ваквиот интерес е показател дека граѓаните се сè посвестни за значењето на превенцијата. Оваа година обезбедивме рекорден број дози – 80.000 четиривалентни вакцини од реномираниот производител Абот од Холандија,“ додаде министерот.
Бесплатната вакцина е наменета за повозрасни лица над 65 години, лица со хронични заболувања, здравствени работници, бремени жени, деца од 6 месеци до 5 години, како и за корисници и вработени во домовите за стари лица и другите установи за социјална заштита.
📍Со оваа акција Министерството за здравство повторно ја потенцира својата заложба за превенција, јавна свест и заштита на здравјето на сите граѓани.
