Горан Трајковски, кандидатот на СДСМ за градоначалник на Општина Кисела Вода, истакнува дека главниот мотив за неговата кандидатура е иднината на неговите деца и подобрувањето на квалитетот на живот во општината. „Кисела Вода е голема и убаво место за живеење, но последните 30 години општината стагнираше. Префрлањето одговорности и постојаните расправии не носат напредок. Мораме да гледаме напред, не во минатото“, вели Трајковски.
Според него, најголемите проблеми се урбан хаос, недоволно асфалтирани улици, паркирање, загадување и хигиена. Како решенија за паркирањето предлага изградба на подземни, надземни и монтажни гаражи, како и воведување резидентно паркирање во деловите што граничат со Општина Центар.
Трајковски гарантира дека, доколку биде избран, урбаната мафија нема да има влијание врз него и сите ДУП-ови ќе се носат транспарентно, заедно со граѓаните. „Граѓаните се сопственици на Кисела Вода, а не само бројки за гласање. Ќе бидам достапен пет дена во неделата и ќе отвориме линија ‘Ало градоначалник’ за директна комуникација“, вели тој.
Тој во интервјуто за Слободен Печат додава дека ќе се создадат повеќе зелени површини, нови паркови, пешачки зони и велосипедски патеки, а ревносно ќе се зафати со чистењето на општината, вклучително и дивите депонии, со цел Кисела Вода да стане современо и удобно место за живот за сите жители.
