Фото: Принтскрин
Основниот суд во Неготино донесе пресуда во корист на жител од Демир Капија кој, по подолг спор со својата сосетка, успеал по судски пат да ги наплати парите што му ги должела за земјоделски услуги и позајмица.
Случајот започнал кога мажот ѝ изорал и испрскал лозје на својата комшика, а покрај тоа ѝ позајмил и 13.000 денари. Иако вкупниот износ од 23.200 денари не бил особено висок, тужителот се решил да побара правда пред суд, бидејќи соседката со месеци не ги враќала парите ниту го платила извршениот труд.
Во судската пресуда, објавена на официјалната страница на судот, се наведува дека двајцата не биле само соседи, туку и долгогодишни пријатели. Жената поседувала лозов насад од околу три декари и побарала од комшијата да ѝ помогне со обработка на лозјето – три орања во вредност од 3.600 денари, три прскања за 3.000 денари и три дневници за земјоделски работи во износ од 3.600 денари.
Покрај тоа, таа побарала и заем од 13.000 денари, ветувајќи дека ќе го врати долгот веднаш по продажбата на грозјето, најдоцна до септември 2024 година.
