Иако е родена илјадници километри далеку од Македонија, младата пејачка Кајла К. успеа да го освои срцето на македонската публика со својата љубов кон традиционалната музика и со глас што, според многумина, потсетува на легендарната Васка Илиева.
Ова талентирано девојче од Мелбурн од мали години покажувало страст кон пеењето. Денес, со само 16 години, веќе има неколку снимено народни песни, а нејзините видеа на социјалните мрежи собираат илјадници прегледи и коментари со пофалби од целиот свет.
Една од песните што предизвика особено внимание е „Личен Илија“, која ѝ е посветена на селото Сирула – родното место на нејзините баба и дедо. Во спотот, снимен во манастирот Свети Прохор Пчински во Донибрук, Кајла се појавува во традиционална македонска носија, што ја прави уште поблиска до корените и македонската публика.
Нејзиниот моќен и топол вокал многумина ги потсетува на незаборавната Васка Илиева – според слушателите, токму поради емоцијата и енергијата со која ја изведува секоја песна.
Кајла ја снимила својата прва песна на само 12 години, а љубовта кон музиката, како што вели, ја наследила од својата баба Стојне, која исто така пеела народни песни.
И покрај тоа што живее во Австралија, таа не ја заборава татковината на своите предци. Напротив – преку песната ја негува македонската култура и ја пренесува на новите генерации таму.
Погледнете како звучи Кајла во својата најнова изведба – млад талент што со гордост ја претставува Македонија на другиот крај од светот.
