Фото: Υπουργείο Πολιτισμού
Група грчки нуркачи за првпат успеаја да извадат предмети од потонатиот „ХМХС Британик“, славниот сестрински брод на „Титаник“, јави „АП Њуз“. По повеќе од еден век поминат на морското дно во Егејот, јавноста конечно доби увид во дел од тајните што ги криеше овој брод.
Меѓу артефактите се наоѓаат ѕвоното од палубата за набљудување, навигациска светилка, патнички двоглед, керамички плочки од турска бања, посребрени послужавници од прва класа, како и порцелански мијалник што припаѓал на втората класа. Голем дел од останатите предмети биле премногу оштетени за да може да се сочуваат.
„Британик“ бил користен како болнички брод во текот на Првата светска војна и потонал во 1916 година во близина на островот Кеа, откако удрил во германска мина.
Според соопштението на грчкото Министерство за култура, условите за нуркање биле исклучително тешки – со силни морски струи и ограничена видливост. Акцијата е реализирана уште во мај, но резултатите дури сега се презентирани во јавност поради комплексната конзервација на пронајдените предмети.
Во мисијата учествувале 11 професионални нуркачи кои користеле специјализирана технологија за дишење со затворен систем, што им овозможило да достигнат длабочина од 120 метри. Проектот го организирал британскиот историчар Сајмон Милс, основач на Фондацијата „Британик“, кој долги години го проучува овој легендарен брод.
Фото: Υπουργείο Πολιτισμού
