Нови детали за двојното убиство и самоубиство во Велес: Момчето на загинатата Росица опишало што се случило

Секторот за внатрешни работи – Велес денеска излезе со нови информации поврзани со вчерашната трагедија во која беа убиени две лица, а напаѓачот подоцна си го одзеде животот.

Според полицијата, на местото на настанот бил затекнат Ф.Т. од Велес, актуелен партнер на убиената Р.К. Тој изјавил дека заедно со неа заминале во домот на нејзиниот татко, бидејќи тој не одговарал на телефонските повици. Во моментот кога Р.К. ја отклучила вратата, на нив налетал нејзиниот поранешен партнер И.С. (39) од Скопје, кој со остар предмет ја нападнал, а потоа ја заклучил вратата.

При интервенцијата, полициските службеници влегле во куќата и го пронашле мртво телото на нејзиниот татко, К.К. (74), кој имал сериозни повреди нанесени со остар предмет. Во просторијата бил затекнат и И.С., исто така со тешки повреди, за кој се претпоставува дека самиот си ги нанел по нападот. Тој бил веднаш префрлен во болницата во Велес, каде што лекарите ја констатирале неговата смрт.