Фото: Принтскрин
Израелското воено воздухопловство ноќеска изведе серија воздушни напади врз пристаништето Ходеида, лоцирано на западниот брег на Јемен. Според сведоци, регистрирани се најмалку пет силни експлозии, а на теренот изби голем пожар.
Израелската армија го потврди нападот, објаснувајќи дека бил одговор на ракетен удар изведен од страна на движењето Ансар Алах (познати како Хути). Минатата недела израелските сили веќе бомбардираа делови од јеменската престолнина Сана и провинцијата Ал-Џауф.
Министерот за одбрана на Израел, Исраел Кац, изјави дека акцијата била насочена кон одржување на „поморската и воздушната блокада на организацијата Хути“. Тој додаде дека групата ќе продолжи да се соочува со „болни удари“ како одговор на секој обид за напад врз Израел.
