Вистинска драма: Полицајка киднапирала и тепала помлада колешка, а малтретирањето го снимала

Во Кочани и Штип изминативе се одвивала вистинска полициска драма, откако млада службеничка на МВР била киднапирана и физички малтретирана од своја колешка со помош на уште едно лице. Случајот, кој го потврди Министерството за внатрешни работи, предизвика големо внимание во јавноста.

Жртвата е 21-годишна полицајка од Штип, со иницијали М.С., вработена во СВР Штип. Таа била пресретната од својата колешка Ј.Н. (28) од Кочани, која со помош на друга жена ја внела во автомобил и ја одвела во една населба во Штип. Таму младата полицајка била тепана, а целиот настан бил снимен со мобилен телефон.

Според информациите, 28-годишната полицајка осомничена за киднапирањето е уапсена во Кочани во текот на вчерашното утро.

Иако официјалната истрага сè уште трае, локалните медиуми пренесуваат дека зад инцидентот стоеле љубовни недоразбирања.

Од МВР соопштија дека по целосното документирање на случајот ќе биде поднесена соодветна кривична пријава против вклучените лица.