Фото: Принтскрин
На воениот полигон Борисовски, околу седумдесет километри од белоруската престолнина Минск, денеска се одвиваше вистинска воена спектакуларна сцена која наликуваше на реален судир. Борбени авиони „Сухој-34“ испуштаа наведувани бомби, предизвикувајќи силни експлозии и густи облаци чад.
Полигонот одекнуваше од огнот на минофрлачи и артилерија, додека хеликоптери за поддршка од воздух и извидувачки дронови дополнително ја засилуваа динамиката на нападот. Сепак, не станува збор за вистинска војна, туку за големата заедничка воена вежба „Запад-2025“, што ја изведуваат руските и белоруските сили, на која беа поканети и претставници на меѓународните медиуми, јавува „Би-Би-Си“.
Овие маневри традиционално се одржуваат на секои четири години, но годинава со значително помал број учесници во споредба со 2021 година, кога во нив беа вклучени околу 200.000 војници.
Москва и Минск тврдат дека целта на вежбата е исклучиво одбранбена и има за цел зајакнување на безбедноста и подготвеноста за потенцијални надворешни закани. Сепак, вакви уверувања беа слушнати и во февруари 2022 година, по завршувањето на вежбата „Сојузничка решителност“, кога токму од белоруска територија руските сили ја започнаа инвазијата врз Украина.
За разлика од тогаш, Белорусија овојпат инсистира на транспарентност, па на „Запад-2025“ присуствуваа набљудувачи од 23 држави, меѓу кои и од САД, Турција и Унгарија, како и бројни воени аташеи.
Според „Би-Би-Си“, повикувањето на меѓународни медиуми може да се протолкува на два начина: од една страна како обид на Минск да покаже отвореност и транспарентност, но од друга страна, преку демонстрацијата на воена моќ, упатена е и јасна порака до Западот – пред сè до Европа: „Размислете двапати, судир со Москва не е во ваш интерес.“
