Собир во вторник во Скопје во чест на загинатите во Кочани: „Вака веќе не може“

Движењето „Кој е следен“ најави собир на плоштадот во Скопје, по шест месеци од трагичниот настан во дискотеката „Пулс“ во Кочани, каде загинаа 62 лица. Собирот е закажан за вторник, 16 септември, во 20:16 часот.

„Ова не беше несреќа ниту трагедија – тоа беше масакр. Свирепо убиство извршено од страна на дисфункционалните институции и партискиот картел. Младите повикаа на тивок собир под ѕвездено небо. Вака веќе не може. Не смееме да молчиме. Болката мора да ја почувствуваме сите заедно и таа болка да нѐ поттикне на акција. Најважно е да не престанеме да се бориме за вистината, да не останеме неми пред неправдата и да преземеме одговорност, секој на свој начин“, се наведува во соопштението на организаторите.