Основното јавно обвинителство Скопје нареди истражна постапка против двајца мажи на возраст од 44 и 46 години, осомничени дека предизвикале тешки телесни повреди што завршиле со смрт.
Инцидентот се случил на 10 септември во вечерните часови во паркот „Жена-борец“ во Скопје. Според истрагата, тројцата се сретнале и заедно консумирале алкохол, а поради расправија вербалниот конфликт прераснал во физичка пресметка. Осомничените нанесле удари и клоци по телото и главата на жртвата, предизвикувајќи сериозни повреди од кои лицето починало два дена подоцна во болница.
Јавниот обвинител поднесе предлог до Основниот кривичен суд Скопје за определување притвор за двајцата осомничени, додека истрагата продолжува.
